સ્ટુઅર્ટ બ્રોડે ઈન્ટરનેશનલ ક્રિકેટમાંથી નિવૃત્તિ જાહેર કરી

સ્ટુઅર્ટ બ્રોડે ઈન્ટરનેશનલ ક્રિકેટમાંથી નિવૃત્તિ જાહેર કરી

ઈંગ્લેન્ડના ઝડપી બોલર સ્ટુઅર્ટ બ્રોડે તેની છેલ્લી આંતરરાષ્ટ્રીય મેચ 1 ઓગસ્ટના રોજ રમી હતી. ઓસ્ટ્રેલિયા સામેની આ એશિઝ ટેસ્ટ 37 વર્ષીય બ્રોડ માટે સપનાથી ઓછી નથી. તેણે બેટિંગમાં તેની કારકિર્દીના છેલ્લા બોલ પર સિક્સર ફટકારી અને તેની બોલિંગના છેલ્લા બોલ પર વિકેટ લીધી. બ્રોડની આ વિકેટ સાથે ઈંગ્લેન્ડે એશિઝ શ્રેણીની પાંચમી ટેસ્ટ જીતી લીધી હતી.

બ્રોડે તેની કારકિર્દીનો અંત 604 ટેસ્ટ વિકેટ સાથે કર્યો હતો. તેના સાથી ખેલાડી જેમ્સ એન્ડરસન સિવાય વિશ્વના અન્ય કોઈ ફાસ્ટ બોલરે ટેસ્ટમાં આટલી વિકેટ ઝડપી નથી. આ આંકડા સૂચવે છે કે બ્રોડની કારકિર્દી એક ફેયરી ટેલ (પરીકથા) હોવી જોઈએ. જ્યાંથી તેણે ક્રિકેટ છોડી દીધું છે ત્યાંથી તે બિલકુલ એક ફેયરી ટેલ જેવું લાગે છે, પરંતુ આ કારકિર્દીનો પ્રારંભિક તબક્કો જરા પણ સારો ન હતો.

ડેબ્યૂ વર્લ્ડ કપમાં વેસ્ટઈન્ડીઝ સામેની મેચ જીતી
20 વર્ષીય સ્ટુઅર્ટ બ્રોડે 28 ઓગસ્ટ 2006ના રોજ ઈંગ્લેન્ડ માટે પ્રથમ ટી20 રમી હતી. બે દિવસ પછી જ તેણે વનડેમાં ડેબ્યૂ કર્યું. પાકિસ્તાન સામે સતત 5 મેચમાં 5 વિકેટ લીધા બાદ તેને 2007 વનડે વર્લ્ડ કપની ટીમનો પણ ભાગ બનાવવામાં આવ્યો હતો.

ઈંગ્લેન્ડે ગ્રુપ અને સુપર-8 સ્ટેજ સહિત 8 મેચ રમી હતી, પરંતુ બ્રોડને પ્લેઈંગ-11માં સ્થાન મળ્યું ન હતું. ટીમની છેલ્લી મેચમાં તેને વેસ્ટઈન્ડીઝ સામે તક મળી હતી. બંને ટીમો સેમિફાઈનલની રેસમાંથી બહાર થઈ ગઈ હતી, લડાઈ માત્ર નંબર-5 પોઝિશન માટે હતી. વેસ્ટઈન્ડીઝે પ્રથમ બેટિંગ કરીને 300 રન બનાવ્યા હતા. સ્ટુઅર્ટ બ્રોડે 6 ઓવર નાખી, પરંતુ તેને વિકેટ મળી ન હતી.

301 રનના લક્ષ્યાંક સામે ઇંગ્લેન્ડે 49.2 ઓવરમાં 298 રનમાં 9મી વિકેટ ગુમાવી દીધી હતી. જેમ્સ એન્ડરસન બ્રોડ સાથે બેટિંગ કરવા આવ્યો હતો. ટીમને 4 બોલમાં માત્ર 3 રનની જરૂર હતી, અહીં એન્ડરસને લેગ-બાય લીધો. ડ્વેન બ્રાવો ફરીથી ધીમો બોલ ફેંકે છે, બ્રોડ શોટ લે છે, પરંતુ બોલ ફિલ્ડરના હાથમાં જાય છે. આગળના બોલે બ્રાવોએ ફરીથી ધીમી બોલિંગ કરી, યુવાન બ્રોડે કવર પર શોટ રમ્યો અને 2 રન લઈને ટીમને રોમાંચક મેચમાં એક વિકેટથી જીત અપાવી હતી.

યુવરાજની 6 છગ્ગાએ આત્મવિશ્વાસ તોડી નાખ્યો
વનડે વર્લ્ડ કપમાં ડેબ્યૂ કર્યા બાદ બ્રોડને 2007ની T20 વર્લ્ડ કપમાં પણ તક મળી હતી. અહીં ભારત સામેની મેચમાં તેણે પોતાની 3 ઓવરમાં માત્ર 24 રન આપ્યા હતા. ટીમ ઈન્ડિયાએ 18 ઓવરમાં 171 રન બનાવ્યા હતા, એ જ ઓવરમાં યુવરાજ સિંહ ઈંગ્લેન્ડના બોલર એન્ડ્ર્યુ ફ્લિન્ટોફ સાથે ઝઘડો થયો હતો.

યુવરાજે આગામી ઓવરમાં બ્રોડ પર ફ્લિન્ટોફનો ગુસ્સો આઉટ કર્યો અને તેની ઓવરના 6 બોલમાં સતત 6 સિક્સર ફટકારી. એક સમયે 3 ઓવરમાં 24 રન આપનાર બ્રોડે 4 ઓવરમાં 60 રન આપીને પોતાના સ્પેલનો અંત કર્યો હતો. ટીમ ઈન્ડિયાએ 218 રનનો સ્કોર કર્યો અને મેચ પણ 18 રને જીતી લીધી.

એન્ડરસન સાથે 1000 ટેસ્ટ વિકેટ
આંતરરાષ્ટ્રીય ક્રિકેટના મોટા ભાગના ફાસ્ટ બોલરો 33થી 35 વર્ષની વય વટાવ્યા પછી ફોર્મમાંથી બહાર થવા લાગે છે. ડેલ સ્ટેન, ગ્લેન મેકગ્રા, વસીમ અકરમ અને ઝહીર ખાન જેવા બોલરો તેનું ઉદાહરણ છે, પરંતુ 37 વર્ષીય સ્ટુઅર્ટ બ્રોડ અને 41 વર્ષીય જેમ્સ એન્ડરસન સાથે આવું બન્યું ન હતું, કારણ કે બંનેએ આઠ વર્ષ પહેલાં માત્ર એક ફોર્મેટ પર ધ્યાન કેન્દ્રિત કરવા માટે મર્યાદિત ઓવરોની ક્રિકેટ છોડી દીધી હતી.

બ્રોડ-એન્ડરસને પોતાની બોલિંગથી ઈંગ્લેન્ડને ઘણી મેચો જિતાડી હતી. બંનેની જોડી ટેસ્ટ ક્રિકેટની સૌથી સફળ જોડી પણ હતી. બંનેએ એકસાથે 138 ટેસ્ટ રમી હતી, જેમાં તેમણે 1039 વિકેટ લીધી હતી. તેના પછી ઓસ્ટ્રેલિયાના શેન વોર્ન અને ગ્લેન મેકગ્રાનો નંબર આવે છે, જેમણે મળીને 104 ટેસ્ટમાં 1001 વિકેટ લીધી છે.